हेटौंडा —एआई प्रविधिमा आधारित बहुभाषिक सूचना प्लेटफर्म दागाची एप, मकवानपुरमा आयोजित पत्रकार सम्मेलनमार्फत सार्वजनिक गरिएको छ।
मनसाचोकस्थित डाँफे प्यालेस होटलमा आज पत्रकार सम्मेलन मार्फत एपका नेपाल प्रतिनिधि माधव सापकोटाले दागाची एपको उद्देश्य, कार्यप्रणाली र भविष्यका योजनाबारे विस्तृत जानकारी गराएको हो ।
प्रतिनिधि सापकोटाका अनुसार यो एपको मुख्य लक्ष्य कोरियामा कार्यरत र भविष्यमा कोरिया जाने तयारीमा रहेका विदेशी नागरिकलाई भाषागत अवरोध बिना सही र विश्वसनीय सूचना उपलब्ध गराउनु हो।
हाल कोरियामा रहेका विदेशी कामदार, विद्यार्थी र पर्यटकहरूले सरकारी सूचना बुझ्न, रोजगारी, आवास, इन्टर्नसिप, कानुनी प्रक्रिया र आपतकालीन अवस्थामा सही निर्णय लिन कठिनाइ भोग्दै आएका छन्। यस्ता समस्याको समाधान गर्न यो एप विकास गरिएको हो।
दागाची एपले हाल १६ भन्दा बढी भाषामा सूचना सेवा दिइरहेको छ। एपमा श्रम, भिसा, स्वास्थ्य र कानुनसम्बन्धी जानकारी, रोजगारी, घर(कोठा खोज्ने, विश्वविद्यालय भर्ना प्रक्रिया, आपतकालीन सहायता र सुरक्षा सम्बन्धी सूचना उपलब्ध छ । एआई आधारित सरल र सुरक्षित प्रणाली प्रयोग गरिएको सापकोटाले बताए।
यो एपलाई केवल सूचना दिने माध्यममा मात्र सीमित नराखी विदेशी नागरिकका लागि विश्वसनीय डिजिटल सहायकको रूपमा विकास गर्ने दीर्घकालीन लक्ष्य रहेको उनले स्पष्ट पारे।
नेपालमा रहेका विदेशी नागरिकले नेपाली समाज, सेवा, स्वास्थ्य, कानुन, अवसर र आर्थिक गतिविधिसम्बन्धी जानकारी आफ्नै मातृभाषामा पाउन सक्ने व्यवस्था गरिएको छ। नेपाली उद्यमीहरूले यो एपमार्फत आफ्ना सेवा र व्यवसायलाई अन्तर्राष्ट्रिय बजारसम्म विस्तार गर्न सक्ने अपेक्षा गरिएको छ।
हालै सम्झौता भएका संस्थालाई दागाची एपमा प्रमाणित चिन्ह प्रदान गरिने र सदस्यता सेवा सञ्चालनमा ल्याइएको जानकारी दिइएको छ। सञ्चारकर्र्मीका लागि कोरिया र अन्य मुलुकका प्रमुख समाचार नेपाली भाषामा उपलब्ध गराइने व्यवस्था गरिएको छ।
आगामी दिनमा एपमा थप नयाँ सुविधा समावेश गरिने र समय(समयमा जानकारी दिइने आयोजकले बताएका छन्।
कार्यक्रमको अन्त्यमा नेपाल प्रतिनिधि सापकोटाले सञ्चारकर्मीलाई धन्यवाद दिँदै पत्रकारका प्रश्नको उत्तर दिएका थिए। सो पत्रकार सम्मेलनमा नेपाल पत्रकार महासंघ बागमती प्रदेश उपाध्यक्ष हरि हुमागाई,जिल्ला अध्यक्ष बालकृष्ण अधिकारी,उपाध्यक्ष धुब्र अधिकारी,भावना रिजाल लगायत विभिन्न संचार माध्यामका पत्रकारहरुको उपस्थित रहेको थियो।
