मकवानपुर । गुरु पूर्णिमाको उज्यालो बिहान। मकवानपुरको एउटा सभा हल उत्सवको रौनकले भरिएको थियो। सादा पोशाकमा अनुहारभरि अनुभवका रेखाहरु बोकेका शिक्षकहरू, जसले दशकौँसम्म ज्ञानको उज्यालो छर्दै आएका थिए, आज आफ्नै विद्यार्थी र समकालीन शिक्षासेवीहरूबाट सम्मानित हुँदै थिए। नेपाल निवृत्त शिक्षक समाजले आयोजना गरेको विशेष कार्यक्रममा नौ जना ज्येष्ठ शिक्षकहरूलाई ‘ज्येष्ठ नागरिक शिक्षक सम्मान’ अर्पण गरिँदा उपस्थित हरेकको आँखामा सम्मानको आभा र समर्पणको भाव छल्किरहेको थियो।
सम्मान प्राप्त गर्ने शिक्षकहरूमा केशव प्रसाद शर्मा न्यौपाने, शंकरप्रसाद लामिछाने, विष्णुप्रसाद सुवेदी, नागेन्द्र ठाकुर, प्रेमजी श्रेष्ठ, शिवप्रसाद गिरी, निरञ्जन अधिकारी र सानुनानी अधिकारी रहेका थिए। यिनीहरूको योगदान शिक्षाको पाठशालाभन्दा बाहिर समाजमा पनि उतिकै महत्वपूर्ण थियो। हरेक नामसँग एउटा प्रेरणादायक कथा गाँसिएको थियो-कहिले विकट गाउँमा जाँदै, कहिले नयाँ पद्धति ल्याउँदै, त कहिले अभावमा पनि अध्यापन नछोडी नयाँ पुस्ता निर्माण गर्दै।
कार्यक्रमको अर्को विशेष आकर्षण थियो ‘राम-सावित्री नेपाली भाषा शिक्षक सम्मान २०८२’, जसले नेपाली भाषा शिक्षामा समर्पित गोविन्द आचार्यलाई सम्मानित गर्यो। स्वर्गीय राम र सावित्री भुजेलको नाममा स्थापना गरिएको यो सम्मानले भाषा शिक्षामा निष्ठा र योगदानलाई विशेष स्थान दिएको छ।
अध्यक्ष सिताराम दाहालको अध्यक्षता र महासचिव अभिमन्यु गौतमको प्रमुख आतिथ्यतामा भएको कार्यक्रममा निवृत्त शिक्षक समाजका सल्लाहकार हरिप्रसाद सिग्देल, रमेश लामिछाने, अरुणकुमार खतिवडा, बागमती प्रदेश कमिटी सदस्य तथा निवर्तमान अध्यक्ष शिवदयाल यादव लगायतका व्यक्तित्वहरूको उपस्थिति थियो।
